VOA News: ព័ត៌មាន: “ក្រុមអ្នកវិភាគនិយាយថាគណបក្សកាន់អំណាចវាយប្រហារលើគណបក្សប្រឆាំងមុនការបោះឆ្នោតឆ្នាំ២០១២” plus 2 more |
- ក្រុមអ្នកវិភាគនិយាយថាគណបក្សកាន់អំណាចវាយប្រហារលើគណបក្សប្រឆាំងមុនការបោះឆ្នោតឆ្នាំ២០១២
- សាលាក្តីខ្មែរក្រហមត្រូវការព័ត៌មានបន្ថែមអំពីសាក្សីនិងអ្នកជំនាញសម្រាប់ករណី០០២
- សាលាក្តីខ្មែរក្រហមជួយដល់ការរកយុត្តិធម៌សម្រាប់ជនរងគ្រោះនៃរបបខ្មែរក្រហម
| ក្រុមអ្នកវិភាគនិយាយថាគណបក្សកាន់អំណាចវាយប្រហារលើគណបក្សប្រឆាំងមុនការបោះឆ្នោតឆ្នាំ២០១២ Posted: 08 Jun 2011 01:51 PM PDT ក្រុមអ្នកវិភាគ បាននិយាយនៅថ្ងៃពុធនេះថាលោកនាយករដ្ឋមន្ត្រី ហ៊ុន សែន បានបន្តការវាយប្រហារបន្តុះបង្អាប់គូរសត្រូវនយោបាយរបស់លោកមុនការបោះឆ្នោតមកដល់ បន្ទាប់ពីសុន្ទរកថា ដែល លោកបានលើកឡើងពីកិត្តិយសក្នុងការជួយបង្កើតគណបក្សសិទ្ធិមនុស្ស និងគណបក្សសម រង្សី កន្លង មកនេះ។ លោកនាយករដ្ឋមន្ត្រី ហ៊ុន សែន បានថ្លែងនៅក្នុងពិធីប្រគល់សញ្ញាបត្រ័នៅសាលាភូមិន្ទរដ្ឋបាល កាលពី ថ្ងៃច័ន្ទថា លោកបានណែនាំ និងជួយបង្កើតគណបក្សសិទ្ធិមនុស្សរបស់លោក កឹម សុខានៅក្នុងឆ្នាំ២០០៧ និងបានណែនាំលោក សម រង្សី ដាក់សំណើធ្វើវិសោធនកម្មរដ្ឋធម្មនុញ្ញ ដើម្បីផ្លាស់ប្តូររូបមន្ត សម្រាប់បង្កើតរាជរដ្ឋាភិបាលពីសំឡេងសមាជិករដ្ឋសភាពីរភាគបី មកសំឡេង៥០ភាគរយបូកមួយ ហើយគ្រប់គណបក្សនយោបាយទាំងអស់សុទ្ធតែសុំយោបល់របស់លោក រួមទាំងគណបក្ស សម រង្សី ។ ក្រុមអ្នកវិភាគបានចាត់ទុកការទម្លាយរឿងសម្ងាត់នយោបាយរវាងលោកនាយករដ្ឋមន្ត្រីហ៊ុន សែន ជាមួយ នឹង គូសត្រូវនយោបាយរបស់លោក គឺលោក កឹម សុខា ប្រធានគណបក្សសិទ្ធិមនុស្ស និងលោក សម រង្សី ប្រធានគណបក្សសម រង្សី ថាជាយុទ្ធសាស្ត្រនយោបាយដ៏សំខាន់ក្នុងការធ្វើឱ្យទន់ខ្សោយ ដល់ប្រជាប្រិយភាព និងឥទ្ធិពលនយោបាយរបស់គណបក្សប្រឆាំង។ លោកឡាវ ម៉ុងហៃ អតីតអ្នកស្រាវជ្រាវជាន់ខ្ពស់នៃគណៈកម្មការសិទ្ធិមនុស្សអាស៊ី បានថ្លែងថាការទម្លាយ រឿងសម្ងាត់នេះ អាចធ្វើឱ្យអ្នកបោះឆ្នោតលែងជឿទុកចិត្តលើគណបក្សសម រង្សី និងគណបក្សសិទ្ធិមនុស្ស ហើយបែរជាមកផ្តល់សេចក្តីទុកចិត្តលើគណបក្សប្រជាជនកម្ពុជាវិញ។ លោក ឡាវ ម៉ុងហៃ បានបន្ថែមថាយុទ្ធសាស្ត្រនេះអាចធ្វើជាការសាកល្បងលើការគាំទ្រ ឬប្រជាប្រិយភាព របស់គណបក្សកាន់អំណាចនៅតែរឹងមាំដដែល ឬ កាន់តែរឹងមាំថែមទៀត ឬ ចុះអន់ថយ។ «ការទម្លាយរឿងសម្ងាត់នៅក្នុងកាលៈទេសៈសព្វថ្ងៃ គឺប្រហែលជាប្រយោជន៍ទៅដល់ការបោះឆ្នោតឃុំសង្កាត់ឆ្នាំ២០១២ ហើយការផ្សព្វផ្សាយរឿងសម្ងាត់នេះប្រហែលជាធ្វើឱ្យមានការច្រឡូកច្រឡំ ឬ បង្កើត ការមិនទុកចិត្តពីសាធារណៈទៅលើគណបក្ស។ យុទ្ធសាស្ត្នេះមិនមានអ្វីថ្មីទេ ក្នុងការស្វែងរកអំណាច យកមកកាន់កាប់ ឬ ប្រមូលការគាំទ្រអំណាចដែលមានស្រាប់»។ លោកហង្ស ពុទ្ធា នាយកប្រតិបត្តិនៃគណៈកម្មាធិការបោះឆ្នោតអព្យាក្រិត្យ និងមិនលំអៀង (និចហ្វិក) បានថ្លែងថាការទម្លាយរឿងសម្ងាត់នេះអាចធ្វើឱ្យគណបក្សសិទ្ធិមនុស្ស និងគណបក្ស សម រង្សី បាត់បង់ សេចក្តីទុកចិត្តពីប្រជាពលរដ្ឋនៅក្នុងការបោះឆ្នោតខាងមុខ ហើយប្រជាពលរដ្ឋបែរជាមកគាំទ្រគណបក្សប្រជាជនកម្ពុជាកាន់តែច្រើនឡើងវិញ។ «នេះអាចជាហេតុផលមួយ ដើម្បីឱ្យការទុកចិត្តរបស់ប្រជាពលរដ្ឋមានការពិនិត្យឡើងវិញនូវអ្វីដែលជាការសម្រេចចិត្តរបស់ប្រជាពលរដ្ឋ ។ខ្ញុំគិតថាការទម្លាយរឿងសម្ងាត់នេះគឺជាយុទ្ធសាស្ត្រដណ្តើមសន្លឹកឆ្នោត»។ លោកឈាង វណ្ណារិទ្ធ នាយកប្រតិបត្តិនៃវិទ្យាស្ថានកម្ពុជា ដើម្បីកិច្ចសហប្រតិបត្តិការ និងសន្តិភាពបាន ថ្លែងថាការបោះឆ្នោតឃុំ សង្កាត់ឆ្នាំ២០១២ និងការបោះឆ្នោតជាតិឆ្នាំ២០១៣ គឺជាវេទិកានយោបាយមួយ ដ៏សំខាន់ ដើម្បីប្រកួតប្រជែងដណ្តើមសន្លឹកឆ្នោត។ «អ្វីទាំងអស់ដែលគណបក្សនយោបាយកំពុងតែធ្វើ ដើម្បីទាញយកប្រជាប្រិយភាពដល់គណបក្សរបស់ខ្លួន និងដើម្បីកាត់បន្ថយប្រជាប្រិយភាពរបស់គណបក្សនយោបាយដទៃ។ នេះគឺជានយោបាយមួយ ដែលខ្ញុំគិតថាគណបក្សនយោបាយទាំងអស់កំពុងតែប្រើនៅកម្ពុជានេះ ដើម្បីឈានទៅរកការបោះឆ្នោតឃុំសង្កាត់ ឆ្នាំ២០១២ និងការបោះឆ្នោតជាតិឆ្នាំ២០១៣។ វាអាចចូលទៅក្នុងទ្រឹស្តី Divide and Conquerដើម្បីបំបែកបំបាក់គណបក្សដែលប្រឆាំងជាមួយនឹងគណបក្សរបស់ខ្លួន»។ លោកប៉ុល ហំម អ្នកនាំពាក្យគណបក្សសិទ្ធិមនុស្ស បានថ្លែងថាលោកនាយករដ្ឋមន្ត្រីហ៊ុន សែន បានប្រើ ល្បិចចាស់ ដើម្បីបន្តុះបង្អាប់ គណបក្សសិទ្ធិមនុស្ស។ លោកយឹម សុវណ្ណ អ្នកនាំពាក្យគណបក្ស សម រង្សី បានបញ្ជាក់ថាគណបក្ស សម រង្សី គ្មានរឿងសម្ងាត់ជាមួយលោកនាយករដ្ឋមន្ត្រី ហ៊ុន សែន ទេ។ ក្នុងឆ្នាំ២០០៦ លោក សម រង្សី ធ្លាប់បានជួបជាមួយលោកនាយករដ្ឋមន្ត្រី ហ៊ុន សែន នៅគេហដ្ឋានរបស់លោក ហើយក៏អាចនិយាយគ្នាតាមទូរស័ព្ទ៕ This posting includes an audio/video/photo media file: Download Now |
| សាលាក្តីខ្មែរក្រហមត្រូវការព័ត៌មានបន្ថែមអំពីសាក្សីនិងអ្នកជំនាញសម្រាប់ករណី០០២ Posted: 08 Jun 2011 01:37 PM PDT លោកនិល ណុន ប្រធានអង្គជំនុំជម្រះសាលាដំបូងរបស់សាលាក្តីខ្មែរក្រហមបានជំរុញឲ្យភាគីទាំងអស់ផ្តល់ព័ត៌មានបន្ថែមទៀតចំពោះសាក្សីនិងអ្នកជំនាញដែលត្រូវដាក់បញ្ចូលនៅក្នុងសំណុំរឿង០០២ ឲ្យបានត្រឹមថ្ងៃទី២០ ខែមិថុនា ខាងមុខនេះ។ សាលាក្តីសម្រាប់កាត់ទោសពួកអតីតមេដឹកនាំខ្មែរក្រហមគ្រោងនឹងបើកសវនាការជាបឋមចំពោះសំណុំរឿង០០២ ដែលមានជនជាប់ចោទចំនួនបួនរូប គឺលោកខៀវ សំផន លោកនួន ជា លោកអៀង សារី និងអ្នកស្រីអៀង ធីរិទ្ធ នៅថ្ងៃទី២៧ រហូតដល់ថ្ងៃទី៣០ ខែមិថុនា។ នៅក្នុងសេចក្តីជូនដំណឹងរបស់សាលាក្តីខ្មែរក្រហម បានបង្គាប់ឲ្យគ្រប់ភាគីទាំងអស់ធ្វើការពន្យល់បន្ថែម និងសង្ខេបឲ្យបានខ្លីៗ តាមដែលអាចធ្វើទៅបាន ចំពោះសាក្សី និងអ្នកជំនាញ។ ចំពោះបញ្ជីឈ្មោះ បុគ្គលដែលជាសាក្សីនិងអ្នកជំនាញ ដែលត្រូវដាក់ពិចារណាមានបួនចំណុច ដែល រួមមានរចនាសម្ព័ន្ធនៃរបបកម្ពុជាប្រជាធិបតេយ្យ តួនាទីរបស់ជនជាប់ចោទម្នាក់នៅក្នុងអំឡុងពេលមុនការបង្កើតកម្ពុជាប្រជាធិបតេយ្យ រួមទាំងពេលដែលជនជាប់ចោទ បានទទួលតួនាទីនោះ តួនាទីជាជនជាប់ចោទ ម្នាក់ៗក្នុងរដ្ឋាភិបាលកម្ពុជាប្រជាធិបតេយ្យ ការទទួលខុសត្រូវរបស់ជនជាប់ចោទ តាមការចាត់តាំង និងគោលនយោបាយនៃរបបកម្ពុជាប្រជាធិបតេយ្យស្តីពីបញ្ហានានា ដែលបានលើកឡើងនៅក្នុងដីកាបញ្ជូនរឿងទៅជំនុំជម្រះ។ លោកឌឹម សុវណ្ណារុំ មន្រ្តីទទួលបន្ទុកផ្នែកកិច្ចការសាធារណៈ បានមានប្រសាសន៍ថាសាលាក្តីខ្មែរក្រហមបានទទួលសាក្សី អ្នកជំនាញនិងដើមបណ្តឹងរដ្ឋប្បវេណី ដែលបានដាក់គ្រប់ភាគីមានចំនួន១.០៩២នាក់។ លោកបានមានប្រសាសន៍ថា យើងមិនទាន់សម្រេចចុងក្រោយថាតើនឹងត្រូវជ្រើសរើសសាក្សី និង អ្នក ជំនាញប៉ុន្មាននាក់ទេ ដែលត្រូវ នឹងដាក់បញ្ចូលនៅក្នុងសំណុំរឿង០០២នោះ។ «តើចុងក្រោយនិងសម្រេចប៉ុន្មានគឺមិនទាន់ដឹងនៅឡើយទេ ដោយសារតែអង្គជំនុំជម្រះសាលាក្តី ដំបូង នឹងពិភាក្សានៅលើចំណុចហ្នឹង ក្នុងពេលដែលមានសវនាការជាបឋម ដែលនឹងប្រព្រឹត្តទៅពីថ្ងៃទី២៧ ខែមិថុនាឆ្នាំ២០១១នេះតទៅ។ អញ្ចឹងសវនាការបឋម នឹងពិភាក្សាជុំវិញបញ្ជីឈ្មោះរបស់សាក្សី អ្នកជំនាញ និង ដើមបណ្តឹងរដ្ឋប្បវេណី ដែលមានចំនួនច្រើន ហើយយើងជឿជាក់ថា ចំពោះ(ចំនួន) ដ៏ច្រើនលើសលប់នេះមិន អាចអង្គជំនុំជម្រះសាលាដំបូង និងសម្រេចយកទាំងអស់បានទេ»។ លោកហុង គឹមសួន មេធាវីដើមបណ្តឹងរដ្ឋប្បវេណី បានមានប្រសាសន៍ថា នាពេលឆាប់ៗខាងមុខនេះក្រុមមេធាវីដើមបណ្តឹងរដ្ឋប្បវេណីទាំងអស់នឹងបើកកិច្ចប្រជុំគ្នាមួយដើម្បីប្រមូលមតិរៀងៗខ្លួន ចំពោះសាក្សី និងអ្នកជំនាញ ដែលត្រូវដាក់បញ្ចូលធ្វើសក្ខីកម្ម។ «ប្រភេទនៃការទាមទារសំណង គឺជារឿងចម្បងសម្រាប់ដើមបណ្តឹងរដ្ឋប្បវេណី ប៉ុន្តែវាមិនទាន់ដល់ថ្នាក់លម្អិត ដូចនៅបញ្ចប់ទេ។ តុលាការនឹងសួរថាយើង មានប្រភេទយ៉ាងម៉េចដាក់ឲ្យគេ។ ទីពីរទៀត យើង បង្ហាញអំពីថាតើយើងមានដើមបណ្តឹងប៉ុន្មាននាក់ឡើងធ្វើសក្ខីកម្ម ដែលទាក់ទិនទៅជាមួយអង្គហេតុនីមួយៗ តើយើងមានសាក្សីប៉ុន្មាន ដែលបង្ហាញគាំទ្រអង្គហេតុយើង និងអ្នកជំនាញថែមទៀត»។ លោកឡាត់ គី អ្នកសម្របសម្រួលសាលាក្តីខ្មែរក្រហមរបស់សមាគមសិទ្ធិមនុស្សអាដហុក បានមាន ប្រសាសន៍ថា សាក្សី និងអ្នកជំនាញមានសារៈសំខាន់ខ្លាំងណាស់នៅក្នុងសំណុំរឿង០០២។ លោកបានមានប្រសាសន៍ទៀតថា អ្នកជំនាញ គួតែទៅដាក់ឲ្យបានច្រើន ដើម្បីលាតត្រដាងពីការណ៍ពិត។ «ដោយសារតែសំណុំរឿងនេះ គឺពាក់ព័ន្ធជាមួយនឹងសំណុំរឿងរបស់មេដឹកនាំនៅក្នុងរបបកម្ពុជាប្រជាធិបតេយ្យ ជាសំណុំរឿងមួយ ដែលមានលក្ខណៈស្មុគស្មាញ។ បើសិនណាជំនាញអាចយកបានច្រើន កាលណា គឺល្អកាលហ្នឹង ដើម្បីធ្វើយ៉ាងម៉េចគឺលាតត្រដាងការណ៍ពិត បង្ហាញនូវការណ៍ពិតឲ្យជនជាប់ចោទគាត់អាចទទួលយកនូវទឡ្ហីករណ៍ ឬក៏ហេតុការណ៍ដែលកើតឡើងនៅកាលហ្នឹង»។ This posting includes an audio/video/photo media file: Download Now |
| សាលាក្តីខ្មែរក្រហមជួយដល់ការរកយុត្តិធម៌សម្រាប់ជនរងគ្រោះនៃរបបខ្មែរក្រហម Posted: 08 Jun 2011 01:16 PM PDT សាលាក្ដីខ្មែរក្រហមនឹងជួយនាំមកនូវយុត្តិធម៌ ការផ្សះផ្សារបួសផ្លូវចិត្តសម្រាប់ជនរងគ្រោះដោយរបបកម្ពុជាប្រជាធិបតេយ្យ។ នេះគឺជាលទ្ធផលនៃការស្ទង់មតិមួយ ដែលធ្វើឡើងដោយមជ្ឈមណ្ឌលសិទ្ធិមនុស្សនៃសកលវិទ្យាល័យកាលីហ្វ័រនីញ៉ា ប៊ើគលី របស់សហរដ្ឋអាមេរិក។ របាយការណ៍ដែលត្រូវបាន បង្ហាញជាសាធារណៈក្នុងសិក្ខាសិលាមួយនៅព្រឹកថ្ងៃពុធនេះ ក្នុងទីក្រុងភ្នំពេញ។ ការស្ទង់មតិដែលមានចំណងជើងថា «ក្រោយពីការជំនុំជម្រះសំណុំរឿងទី១» គឺសវនាការកាំង ហ្គិចអ៊ាវ ហៅ ឌុច អតីតប្រធានគុកទួលស្លែងដែលបានបញ្ចប់កាលពីខែ កញ្ញា ឆ្នាំ ២០១០ បង្ហាញថា ប្រជាពលរដ្ឋ ជាងបីភាគបួនក្នុងចំណោមប្រជាពលរដ្ឋសរុបចំនួន ១០០០ នាក់ ដែលត្រូវបានចោទសួរក្នុងខេត្តក្រុងទាំង ២៤របស់ប្រទេសកម្ពុជាមានជំនឿថា សាលាក្ដីខ្មែរក្រហមបានជះផលវិជ្ជមានដល់ជនរងគ្រោះ ឬដល់ក្រុម គ្រួសាររបស់ពួកគេ។ តួលេខនេះបង្ហាញអំពីសន្ទុះកើនឡើងបើធៀបនឹងលទ្ធផលនៃការស្ទង់មតិរបស់ មជ្ឈមណ្ឌលដដែលនេះ កាលពីឆ្នាំ២០០៨ ដែលកាលនោះប្រជាពលរដ្ឋដែលគិតពីផលវិជ្ជមាន របស់សាលាក្ដីនោះមានត្រឹមតែ ៦៨ភាគរយតែប៉ុណ្ណោះ។ ការស្ទង់មតិដែលបានបញ្ចប់កាលពីខែធ្នូ ឆ្នាំកន្លងទៅបង្ហាញបន្ថែមថា ៣៧ ភាគរយនៃអ្នកដែលត្រូវបានសម្ភាសន៍យល់ថា សាលាក្ដីនឹងនាំមកនូវយុត្តិធម៌។ រីឯ២៥ភាគរយទៀត យល់ថាដំណើរការក្ដីបានជួយ ជនរងគ្រោះឲ្យមានអារម្មណ៍ប្រសើរជាងមុន កាត់បន្ថយកំហឹង ឬក៏ជួយពួកគេឲ្យបញ្ចេញនូវការឈឺចាប់ទាំងផ្លូវកាយ និងផ្លូវចិត្ត ដែលពួកគេទទួលរងនៅក្នុងអំឡុងរបបខ្មែរក្រហម។ ថ្វីបើអ្នកដែលត្រូវបានសម្ភាសន៍ភាគច្រើនប្រកបទៅដោយផលវិជ្ជមាន ក៏ប៉ុន្ដែនៅក្នុងចំណោមអ្នកដែលត្រូវបានសម្ភាសន៍ចំនួន៩ភាគរយ បាននិយាយថា សាលាក្ដីខ្មែរក្រហមបានជះឥទ្ធិពលអាក្រក់ ដូចជាការរំលឹកឡើងវិញនូវអតីតកាលច្រើនពេកដល់ជនរងគ្រោះ ឬក៏ការផ្ដន្ទាទោសមិនត្រូវបានគេដឹងទូលំទូលាយនោះទេ។ ការអង្កេតដដែលបានបានបង្ហាញថា វិទ្យុ និងទូរទស្សន៍ ដើរតួនាទីយ៉ាងសំខាន់ដូចគ្នានៅក្នុងការជួយផ្ដល់ពត៌មានទៅដល់ជនរងគ្រោះអំពីសាលាក្ដីខ្មែរក្រហម និងការកាត់ទោសអតីតពួកមេដឹកនាំជាន់ខ្ពស់ និង អ្នកទទួលខុសត្រូវត្រូវខ្ពស់បំផុតក្នុងសម័យខ្មែរក្រហមគឺ៧៣ភាគរយនៃប្រជាជនដឹងអំពីដំណើការកាត់ ទោសខ្មែរក្រហមតាមវិទ្យុ និង៧២ ភាគរយដឹងតាមរយៈទូរទស្សន៍។ សូមបញ្ជាក់ថា ការស្ទង់មតិមជ្ឈមណ្ឌលសិទ្ធិមនុស្សនៃសកលវិទ្យាល័យកាលីហ្វ័រនីញ៉ា ប៊ើគលី ធ្វើលើប្រជាពលរដ្ឋចាប់ពីអាយុ ១៨ ឆ្នាំឡើង ហើយបានប្រព្រឹត្តទៅនៅក្នុងឃុំចំនួន១២៥ នៃខេត្ត ក្រុងទាំង២៤។ លោក Patrick Vinck នាយកគំនិតផ្ដួចផ្ដើមសម្រាប់ប្រជាពលរដ្ឋងាយរងគ្រោះនៃមជ្ឈមណ្ឌលសិទ្ធិមនុស្ស របស់សកលវិទ្យាល័យកាលីហ្វ័រនីញ៉ា ប៊ើគលី បានថ្លែងក្នុងពិធីបង្ហាញរបាយការណ៍នៃការអង្កេត កាលពីព្រឹកមិញថា ឆ្លងតាមរបាយការណ៍នេះបង្ហាញថា ទំនុកចិត្តរបស់ប្រជាពលរដ្ឋលើសាលាក្ដីខ្មែរមានការ កើនឡើង។ «ខ្ញុំគិតថា សំណួរទាំងនោះបានបង្ហាញនោះ គឺការជឿទុកចិត្តលើតុលាការហាក់ដូចជាមានការកើនឡើង ប៉ុន្ដែវានៅតែមានការរួញរា ដោយមានការគិតដល់អំពើពុករលួយក្នុងសាលាក្ដី។ ប៉ុន្ដែបើនិយាយពីនិន្នាការ នោះ គឺមាននិន្នាការជាវិជ្ជមាន។ សាលាក្ដីខ្មែរក្រហមគ្រោងនឹងបើកសវនាការកបឋមទៅលើសំណុំរឿង ០០២ ដែលមានជនជាប់សង្ស័យ សរុបចំនួនបួននាក់ នៅថ្ងៃទី ២៧ រហូតទៅដល់ថ្ងៃទី ៣០ ខែមិថុនានេះ។ ជនជាប់ចោទទាំងនេះ ត្រូវស្ដី បន្ទោសចំពោះការទទួលខុសត្រូវចំពោះការស្លាប់របស់ប្រជាពលរដ្ឋកម្ពុជាយ៉ាងតិចចំនួន១,៧លាននាក់។ ក្រុមមន្ដ្រីអង្គការសង្គមស៊ីវិល កត់សម្គាល់ក្នុងពិធីបង្ហាញរបាយការណ៍ថា ការយល់ដឹងកើនឡើងក្នុងចំណោមប្រជាពលរដ្ឋទូទៅដូចដែលរបាយការណ៍បានលើកឡើង ក៏ប៉ុន្ដែជនរងគ្រោះ ដែលជាជនជាតិភាគតិចអាចមានចរន្ដខុសពីនេះ។ ដោយឡែកក៏មានការលើកឡើងផងដែរអំពីកង្វះផ្នែកជែនឌើ ក្នុងការស្រាវជ្រាវនេះដែរ។ លោក ឌឹម សុវណ្ណារុំ ប្រធានស្ដីទីផ្នែកកិច្ចការសាធារណៈរបស់សាលាក្ដីខ្មែរក្រហមមាន ប្រសាសន៍ថានេះ ជារបាយការណ៍គួរឲ្យចាប់អារម្មណ៍។ «យើងមិនអាចវាស់វែងថា តើរបាយការណ៍នេះសុក្រិតប៉ុណ្ណានោះទេ។ ប៉ុន្ដែវាជាការចង្អុលបង្ហាញមួយហើយអាចរកជាគន្លឺះធ្វើការកែលំអរក្នុងការខិតខំទៅតាមផ្នែកការងាររបស់ក្រុមនីមួយៗ»។ មជ្ឈមណ្ឌលសិទ្ធិមនុស្សរបស់សកលវិទ្យាល័យកាលីហ្វ័រនីញ៉ា ប៊ើគលី គ្រោងនឹងធ្វើការស្ទង់មតិជាថ្មីនៅ ក្នុងឃុំទាំង១២៥ នៅឆ្នាំក្រោយនេះទៀត៕ This posting includes an audio/video/photo media file: Download Now |
| You are subscribed to email updates from VOA News: ព័ត៌មាន To stop receiving these emails, you may unsubscribe now. | Email delivery powered by Google |
| Google Inc., 20 West Kinzie, Chicago IL USA 60610 | |
